Mudansa klimátika globál fó efeitu ba ema tomak iha mundu. Ohin loron sosiedade iha mundu tomak preokupa ho asuntu ne’e. Institusaun oioin hahu halo serbisu sira oinsá bele asegura efeitu husi mudansa klimátika ne’e. Mudansa ne’e bele fó efeitu ba bailoro-naruk no hamlaha tempu naruk.
Vise-Ministru Komérsiu Indústria no Ambiente Nino Pereira iha enkontru ho diretor rejionál World Food Program David Kaatwad, foka preparativa Timor-Leste nian hasoru fenomena naturál El-Nino iha futuru. Durante enkontru vise-ministru no diretor rejionál WFP mós diskute kona-ba kooperasaun serbisu hodi asegura nesesidade lojistika no mós jestaun armanezamentu.
Tuir vise-ministru Timor-Leste mós tenke iha preparativa ba
problema mudansa klimátika ne’e, tanba bele kauza hamlaha tempu naruk no mós
bailoro-naruk.
“Timor-Leste ohin loron iha ona Centro de Logística Nacional ne’ebé Governu (red, MCIA) bele harii
hodi jere no asegura stock aihaan ba
povu Timor-Leste.” Vise-Ministru hateten iha enkontru badak ne’e (22/09).
David ho ninia delegasaun iha enkontru afirma, WFP hakarak kria
kooperasaun atu fasilita kapasitasaun ba pesoál sira iha CLN oinsá bele jere ho
di’ak no asegura aihaan ba povu Timor-Leste. Tanba mundu tomak tenke prepara an
ba fenomana naturál El-Nino ne’ebé karik sei mosu no afeta ema tomak nian vida.
“Programa Hahan Mundiál hakarak koopera ho Governu
Timor-Leste hodi asegura aihaan no fornese aihaan nutriente ba povu. Ita mós
tenke prepara ba fenomena naturál El-Nino ne’ebé karik mosu afeta ema barak
ninia moris. Entaun ita tenke asegura no jere didi’ak aihaan ba tempu naruk.”
Hateten David.
David ho ninia delegasaun mós iha misaun atu haree estratéjia
nutrisaun iha Timor-Leste. Tanba nutrisaun mós sai asuntu importante ba
dezenvolvimentu rekursu umanu, ne’ebé presiza serbisu kooperasaun ho parseiru no
ho ministériu relevante sira.
Iha enkontru, vise-ministru mós aprezenta programa Governu
nian kona-ba prosesamentu aihaan ne’ebé estabelese hamutuk ho Timor-Vita.
Governu koopera ho empreza hodi fasilita prosesamentu aihaan no fornese ba
programa merenda eskolár. Alein ne’e, Governu (MCIA) mós tau ona prioridade atu
estabelese tan indústria ba prosesamentu supermi (Timor Noodles) iha futuru.
No comments:
Post a Comment