Governu Indianu ofesere oportunidade kapasitasaun rekursu
umanu no mós kooperasaun iha área dezenvolvimentu ekonomia nian ba Governu
Timor-Leste. Asuntu ida-ne’e hatete liuhusi
embasador indianu ba Indonézia no Timor-Leste Gurjit Singh uainhira halo
sorumutu ho vise-ministru MCIA Nino Pereira iha Fomentu, Mandarin, Dili (07/10).
Gurjit esklarese, Governu India
ajuda ona nasaun barak iha aspetu ekonomia no mós dezenvolvimentu rekursu
umanu. Tanba ne’e, Governu India mós hakarak estabelese kooperasaun ho
nasaun-foin-dezenvolve sira, hanesan Timor-Leste, no nasaun seluk iha rejiaun
ázia nian.
“Ha’u hakarak enkoraja mós timoroan
sira liuhosi Governu Timor-Leste, katak Governu India oferese oportunidade
eskola nian ba timoroan ne’ebé iha interese hakarak estuda iha India.” Gurjit
akresenta.
Embasador indianu ne’e mós hatete,
India hanesan nasaun ne’ebé potensiál tebtebes ba produtu kafé no mós seluk
tan. Tanba presiza estabelese kooperasaun ne’ebé di’ak hodi fasilita atividade
eksportasaun no mós investimentu estranjeiru direitu (Foreign Direct Investment)
husi emprezariu indianu sira iha Timor-Leste. Nune’e mós Governu India hakarak
koopera iha dezenvolvimentu seitor agrikultura, tanba Timor-Leste nu’udar
nasaun ne’ebé potensiál tebetebes iha setor agrikultura. Iha projeitu ida husi
Governu Indianu ne’ebé sei implementa iha futuru kona-ba agrikultura
sustentavel.
Iha surumutu ne’e, Vise-Ministru
MCIA Nino Pereira mós informa kona-ba situasaun dezenvolvimentu ekonomia iha
Timor-Leste. Tuir Nino, Timor-Leste presiza estabelese kooperasaun ho nasaun
sira-ne’ebé hakarak tulun povu Timor-Leste no liu-liu tenke haree oportunidade
ba dezenvolvimentu ekonomia iha nasaun ne’e.
No comments:
Post a Comment