Kuandu Foinsa’e Iha Abilidade

Indústria nu’udar setor ne’ebé bele kria oportunidade traballu no valor adesionadu (value added) ba produtu komersiál sira. Maibé timoroan foinsa’e sira presiza iha prontidaun oinsá bele simu investimentu iha setor ne’e iha futuru. 

Dezenvolvimentu iha Timor-Leste ezije partisipasaun timoroan tomak nian. Timoroan ida-idak iha dever atu kontribui ba prosperidade nasaun no povu nian. Maibé rekursu umanu sai hanesan faktor importante liu, kuandu iha foinsa’e ne’ebé iha abilidade no koñesimentu klean iha área importante sira, ajuda lisuk hodi aselera prosesu dezenvolvimentu nasionál. 

“Foinsa’e mós iha papel importante ba dezenvolvimentu. Maibé, partisipasaun foinsa’e sira iha prosesu dezenvolvimentu sei mukit tebes. Tanba ita sei menus koñesimentu no ladun bele kompete ho ema seluk. Maibé tenke buka oportunidade ne’ebé iha hodi kontinua hasa’e abilidade, no Governu oferese oportunidade ba foinsa’e liuhosi kapasitasaun iha área oioin. Aproveita ho didi’ak ba!” Xefe Gabinete Vise-Ministru MCIA José Violante da Silva Reis fó motivasaun ba foinsa’e sira iha enseramentu treinamentu (25/09) husi Diresaun Nasionál Indústria Transformadora, Matadoru, Dili.

José mós husu, foinsa’e labele depende maka’as ba inan-aman kuandu bele  ona halo serbisu. Tan ne’e, joventude tenke fó liman ba malu, oinsá mak foinsa’e sira bele halibur malu iha grupu hodi halo atividade ruma ne’ebé tulun hasa’e rendimentu no fó moris di’ak ba familia no mós bele fó serbisu ba maluk seluk ne’ebé buka serbisu. 

Diretor Nasionál Indústria Transformadora António da Costa relata, programa kapasitasaun sai mós atividade esensiál ida husi programa seluk ministériu nian. Tanba MCIA tau mós prioridade ba dezenvolvimentu rekursu umanu  iha sektor indústria. Programa kapasitasaun ida-ne’e diresaun ida-ne’e halo kada tinan, maske enfrenta hela problema rekursu umanu liuliu treinador sira-ne’ebé iha koñesimentu ka abilidade téknika sira iha área indústria sei menus tebtebes. 

Diresaun Nasionál Indústria Transformadora aplika ona programa treinamentu hanesan prioridade ida ba dezenvolvimentu rekursu umanu iha Timor-Leste. Diretor António afirma liutan, Timor-Leste presiza prepara ninia foinsa’e sira iha área indústria ho koñesimentu ne’ebé di’ak no prontu ba merkadu traballu iha futuru. 

“Tinan ida-ne’e Diresaun Nasionál Indústria Transformadora fó de’it formasaun kona-ba automotive skill no téknika fibra nu’u-kulit; halo ho kombinasaun tais ba kadeira no sofa. Maibé tinan  sira liu bá, DNIT hala’o de’it formasaun kona-ba téknika soldadura no mós fibra nu’u-kulit.” António Informa. 

Responsavel treinamentu Helio A.M. Sarmento informta tan, treinamentu ida-ne’e hala’o durante fulan ida no partisipante hamutuk nain-15. Partisipante sira mai husi munisipiu Ermera, Dili, no Bobonaro. 

“Treinamentu ida-ne’e foka ba technical skill development, ne’ebé aplika 25 porsentu aprende teoria no 75 porsentu aplikasaun teoria iha pratika.” Helio hateten tan. “Partisipante sira mós mai hosi grupu benefisiariu sira. Grupu sira-ne’ebé identifikadu atu hetan treinamentu tuir saida maka sira presiza, no ida-ne’e ajuda sira atu jere no halo sira-nia atividade ho di’ak hodi promove sira-nia empreza.”